MitteLounge al è l’apontament plui rilassât di Mittelfest: un spazi aperitîf che al met dongje musiche e convivialitât. Dôs seradis, lunis ai 21 e martars ai 22 di Lui, li che des 19:30 fin che al va jù il soreli, doi grups musicâi si esibissin par maraveâ il public intune atmosfere rilassade. L’event al è ospitât tal   Ort des Ursulinis, un zardin tant biel che sugjestîf a doi pas dal Munistîr di Sante Marie in Val e dal Templut Langobart. Chest spazi vert, siôr di storie e di incjant, al è l’ambient ideâl par gjoldisi buine musiche e conversazions plasevulis tes seradis di Istât dal festival.

Il Pont aperitîfs al è gjestît dal Bar da Giordano

L’ingrès ai concierts al è libar
Il spazi al vierç aes 19.30 e al siere aes 21.15
In câs di brut timp, l’event nol sarà garantît

Musike senza confini

Doi struments, il violin e la armoniche, che si fondin e si instrecin, ogni tant cun torment, ogni tant cun delicatece. Francesca Koka e Nicola Milan si movin tra partiduris classichis e tocs di vuê, de musiche di cine a un repertori dut gnûf componût e rangjât par cheste formazion. Virtuosisim e elegance a caraterizin chest duet bon di cumbinâ tocs origjinâi e musichis di autôrs tant che Piazzolla e Galliano intun cressi di emozions che al cjape. Fats pôc cognossûts, curiositâts e introduzions simpatichis a crein un conciert che al plâs pe sô maniere di jessi divulgatîf.

Fior delle bolge

Al è alc che al lee la umiditât des vals dal Nadison e dal Lusinç cul polvar dai borcs puars di San Paolo e di Buenos Aires. Une vibrazion ritmiche, che e ven sù tal aiar e che e partìs dai nestris confins orientâi. Dai flums ai torints, passant par sinagoghis e cimitieris bandonâts e po jù pe cjadene dai Balcans bande il Mediterani, sot de ombrene des cinisis di Smirne, fin a sparî dentri dai boscs dal Brasîl par po gjoldisi une polse meretade tra i rivocs de cumbie sot dai cîi de Americhe Latine: ve ca il viaç sul pulsâ dai ritmis dal mont.