Mittelounge al è l’apontament plui rilassât di Mittelfest: un spazi aperitîf che al met dongje musiche e convivialitât. Par cuatri seradis, di lunis ai 20 fin joibe ai 23 di Lui, des 19:15 fin che al va jù il soreli, doi grups musicâi par sere si esibissin par maraveâ il public intune atmosfere rilassade. I concierts a son ospitâts tal Ort des Ursulinis, un zardin tant biel che sugjestîf a doi pas dal Munistîr di Sante Marie di Val e dal Templut Langobart. Chest spazi vert, siôr di storie e di incjant, al è l’ambient ideâl par gjoldisi buine musiche e conversazions plasevulis tes seradis di Istât dal festival.
Program par cure di Alan Liberale, Simone Piva, Leo Virgili

Il Pont aperitîfs al è gjestît dal Bar da Giordano e Al Ponte – La botteguccia dei sapori

L’ingrès ai concierts al è libar
Il spazi al vierç aes 19.30 e al siere aes 21.15.

Pokriva Nočiva

Une band che e rive des Vals dal Nadison, une striche di tiere sul confin tra Italie e Slovenie. Nassûts intant de pandemie tant che reazion artistiche a un timp di isolament, a svilupin un lengaç musicâl personâl che al travierse rock, folk, garage, noise, punk e reggae. La lôr produzion e à lidrîs profondis tal teritori: i tescj, cjantâts tal dialet de Sclavanie e par sloven cun zontis par talian e inglês, a contin lis contradizions e la ricjece culturâl di une zone di confin, tra dispopolament, memorie e tradizions condividudis.

Physalia

Oniria al è l’album di esordi di Physalia, publicât de etichete Okum. Une imersion tal profont dal subcussient che e fâs colâ cui che al scolte intun mont sonôr fat di siums di decifrâ. Un vecjo piano a mûr, percussions preparadis, ogjets, sintetizadôrs e une vision dal sun une vore cinematografiche. La vôs di Physalia e conte, cun fuarce delicade, chei siums vîfs che si fâs fature a capî, che a dan emozions ancje dopo sveâts, tra songwriting, chamber pop e sperimentazion contemporanie.