A Est del Palcoscenico
il grant finâl
“A Est del Palcoscenico” al è un progjet di svilup de ricercje dramaturgjiche su base transnazionâl fra Italie e i Balcans, centrât sui temis dal ambient e de sostignibilitât ambientâl.
I ponts di incuintri a son stâts i laboratoris dramaturgjics pensâts e indreçâts a ducj, massime a zovins e a students, par creâ leams fra art dramatiche e temis modernis.
Dramaturcs zovins, citadins, ambientaliscj di ogni etât, si son svicinâts e a àn partecipât ai tancj laboratoris tignûts dai plui prestigjôs dramaturcs talians e balcanics, come par esempli la dramaturghe bosgnache Tanja Šljivar, ospitade di Mittelfest.
Il laboratori tignût de Šljivar al è stât fat a Cividât dai 16 ai 20 di Mai dal 2023 inte suaze dal progjet “A Est del Palcoscenico/The East Side of the Stage”, e presentât ai 20 di Mai dal 2023, intant dal Mittelyoung.
Tacant dal lavôr dal coletîf Out of the Woods e de autore Denise Ferreira da Silva, il laboratori al à analizât une schirie di tescj sul rapuart tra razisim, capitalisim, nazionalisim, fassisim e mudament climatic. La restituzion, in forme di leture dai contribûts elaborâts dai partecipants, si presente tant che un moment di condivision e di scuvierte di talents zovins.
Viôt dutis lis fotos
e lei la relazion scrite di Tanja Šljivar
Il lavôr di ricercje dramaturgjiche al à viert un spazi gnûf e inedit di colaborazion artistiche tra Italie e Balcans midiant di numerosis residencis dramaturgjichis. Chestis, tal non de reciprocitât e de internazionalizazion, a deventin une rêt struturade di cooperazion e di coproduzion artistiche e culturâl tra i organisims che a partecipin al progjet, cun pussibilitâts di svilup de mobilitât internazionâl dai zovins e di un lôr inseriment tal mont dal lavôr.
Ai 30 di Setembar, des 18:00 aes 20:00, tal Museu Castromediano si tignarà l’incuintri finâl tra ducj i sogjets che a àn colaborât, cun: Alban Nimani (Tulla Center-Albanie), Sonia Antinori (Malte-Italie), Giacomo Pedini (Mittelfest-Italie), Walter Prete e Gustavo D’Aversa (Alibi Teatro-Italie), Borisav Matic (UUU Artistic Utopia-Serbie), Ardiana Shala (Qendra Multimedia-Cossovo), Ivanka Apostolova (ITI-Produkcija–Macedonie dal Nord), Franco Ungaro (Accademia Mediterranea dell’Attore–Italie).
Il 1n di Otubar, invezit, des 18:00 aes 21:00 simpri tal Museu Castromediano – Can I live? di Fehinti Balogun Complicitè Production film e leture coletive par cure di Walter Prete.
Chest progjet al è inmaneât di AMA – Accademia Mediterranea dell’attore, vincidore dal bant Boarding Pass Plus dal Ministeri de Culture in colaborazion cun Mittelfest di Cividât, Malte di Ancona, Alibi di Tricase, ATK di Elbasan (Albanie), Atac di Podgorica (Montenegro), Prudukcija ITI di Skopje (Macedonie dal Nord), Qendra Multimedia di Pristina (Cossovo), UUU Artistic Utopia di Belgrât (Serbie).