Mittelfest al à la sô cjase te Mittelland jenfri Cividât e lis valadis dal Nadison e de Tor. Scuvierzi Mittelfest al vûl dî jentrâ intune cartografie vive, dulà che arbui, mûrs, prâts, bestiis e personis a cjapin il puest di une misture inmagante di vôs e di nons.
Scuvierç la nestre Mittelland cun Promo Turismo F-VJ.
«No sai trops talians che a cognossin Cividât, il borc plui biel dal Friûl, che al manten l’implant langobart plui di Pavie, cul so labirint di stradelis. E gjavant i studiâts massime forescj, in pôcs a cognossin il museu maraveôs e ordenât in maniere maraveose; sculturis di sgjâf, zoiis, crôs, stofis barbarichis, mosaics, codiçs miniâts. E il templut langobart cui siei stucs portentôs sul foran dal Nadison. Mi sarès plasût scoltâ ce che al reste dal cjant aquileiês, une Epistule e un Vanzeli. Mi disin che al è plui antîc dal cjant gregorian, e che al usave a Aquilee cuant che dutis lis glesiis a vevin un lôr cjant, prin che il rît latin lis omologàs. A Aquilee si è pierdût, ma la Messe dal Spadon di Cividât e tramande chel pôc che al è restât. E je la Messe famose de gnot de Epifanie. Un diacun cul elm plumât al strenç cu la man çampe sul so pet un Evangjeliari antîc, si mostre viers il popul e al dissegne par aiar une Crôs cuntune grande spade di açâl; la sô comparizion e ven ripetude sîs voltis»
Guido Piovene, Viaggio in Italia, Milano, Mondadori, 1957.
«Il viandant che une volte al cjapave a cjaval, in caroce o a pît, la strade che di Cividât e mene a soreli jevât, si inacuarzeve in curt che di chestis bandis si fevelave une lenghe diferente di chê dal Friûl. Dopo scjavaçât il puint di piere te localitât di Muost, Puint di San Quarin, e passade la gole ingjavade dal Nadison, al jentrave ta chê regjon che i gjeografs de Republiche venite a clamavin Sclavanie. Daûr des cronichis che a rivavin tai palaçs de Serenissime, chestis tieris montagnosis cu lis clevis verdis, che si slungjavin par adalt viers i pecoi di cret dal fondâl a formavin i confins une vore salvadis dal mont civilizât. Ta chestis valadis stretis, dilunc dai flums e dai torints, e ancje insom des monts, tai lôr paîs di piere cercenâts di pascs larcs, framieç des lôr vacjis, cjavris e pioris, a vivevin i montagnârs fevelant la lôr lenghe slave. Ancje se fin dai timps antîcs a jerin cristians, la lôr fevele e lis lôr usancis, lis superstizions e la miserie ju fasevin dal dut diferents de plui part dai abitants de Republiche ilustre e opulente»
Drago Jančar, Appunti dalla Schiavonia_Zapiski iz Schiavonie, par cure di Michele Obit, voltât di Ivana Placer, Topolò, Stazion di Topolò, 2008.
«La strade cjarezabile che de valade de Turro e va sù a magne par une buine mie, dopo di vê traviersât mieç paisut, par rivâ di chê altre bande e scjavace il Cuarnap disore di un puint, che pal so salt e vivarôs ardiment al podarès jessi stât fat sù dai agnui, come chel di Cividât dal diaul, ma plui innà da la aghe, e passade di pôc la calade dal cjistiel, la bariglarie e sparìs intun slac di lavinis, di gleriis, di barascjam; e di là si slontanin tancj trois ognidun cul so dafâ, un pôcs a tornin a infondâsi tal torint là che al è il lavadôr e la fontane; altris a montin sù pes cuestis sbecoladis dal cret, come par cirî lis cjavris che di sere a tornin li di lôr cuant che al sivile il pastôr; e chel plui braurôs al va dentri dret tal foran dal Cuarnap, e pleantsi cualchi volte al rive a pâr cul torint fin a radâ il so jet, altris si slontane di lui scarm e pericolôs daûr des pleis de cueste, altris ancjemò al cercene cualchi magle di cjastinârs, lant sù a puartâ i prodots alimentârs de plane tai cjasâi dai pastôrs in mont»
Ippolito Nievo, Il conte pecorajo, Milano, Vallardi, 1857.
