Il documentari Sešivalnica spomina/Ricuciture di memoria al conte un teritori che vie pai secui al è stât segnât de frontiere, mantignint però il so caratar unic e unitari. Il traume e il mudament di cheste aree, su dutis dôs lis bandis dal confin, a son sucedûts cu la tendine di fier, vignude jù a dividi Italie e Jugoslavie dopo dal 1947. Vuê cheste zone e je un spazi pal plui disvuedât dai siei abitants origjinaris, ma no par chest mancul determinât a conservâ la dignitât di une sô esistence specifiche. I colocuis video, che lis dôs autoris a àn fat su lis dôs bandis dal confin, a palesin la storie gjenerâl tes piçulis storiis individuâls, di chei che a son restâts tes lôr cjasis, o chei che vuê a son daûr a tornâ tai chei puescj. Di fat, la coniunture storiche gnove e fâs deventâ i confins di gnûf permeabii e dinamics, permetint cussì a formis di vite antighis di rinovâsi, intun teritori che par secui al è stât in comun.

Ingrès libar fin che a son puescj disponibii

Tal câs di brut timp, la proiezion si fasarà te Sale Sociâl de SOMSI di Cividât