E je vierte la Open Call di Mittelyoung 2026, il festival dedicât aes gnovis gjenerazions de sene europeane. Dai 11 di Dicembar dal 2025 ai 10 di Fevrâr dal 2026, artistis e artiscj zovins, compagniis e coletîfs sot dai 30 agns che a vegnin dai 27 Paîs de aree mitteleuropeane e balcaniche a puedin candidâ i lôr progjets di teatri, musiche, danze e circ sul teme dal 2026: la Pôre.
Lis candidaturis si puedin compilâ dal dut online.
I progjets a saran valutâts di un grup di curatores under 30, in colaborazion cun istituzions culturâls e artistichis talianis e forestis. Tra lis propuestis rivadis a saran selezionâts 9 spetacui che a laran in sene a Cividât dai 14 ai 17 di Mai 2026 pe seste edizion di Mittelyoung.
Cheste e je la ocasion par deventâ part di une gnove gjenerazion in sene, cu la pussibilitât di fâsi cognossi a nivel internazionâl e di vivi la esperience di un festival dinamic e creatîf.
