Mittelounge al è l’apontament plui rilassât di Mittelfest: un spazi aperitîf che al met dongje musiche e convivialitât. Par cuatri seradis, di lunis ai 20 fin joibe ai 23 di Lui, des 19:15 fin che al va jù il soreli, doi grups musicâi par sere si esibissin par maraveâ il public intune atmosfere rilassade. I concierts a son ospitâts tal Ort des Ursulinis, un zardin tant biel che sugjestîf a doi pas dal Munistîr di Sante Marie di Val e dal Templut Langobart. Chest spazi vert, siôr di storie e di incjant, al è l’ambient ideâl par gjoldisi buine musiche e conversazions plasevulis tes seradis di Istât dal festival.
Program par cure di Alan Liberale, Simone Piva, Leo Virgili

Il Pont aperitîfs al è gjestît dal Bar da Giordano e Al Ponte – La botteguccia dei sapori

L’ingrès ai concierts al è libar
Il spazi al vierç aes 19.30 e al siere aes 21.15.

I’m in

Une OneManBand nassude in provincie di Udin tal Istât dal 2023. Lis sôs lidrîs a son il punk di Washington DC e la intemperance tal stîl dai Primus. I’m in nol è un ma a son trê: un bas distorsionât in mût pesant, une batarie a pedâi e une vôs inscjatolade intun ampli di ghitare. Alçait il volum, zontait cualchi sun sintetic e cualchi maiute sudade: e saltarà fûr une mandrie sonore pronte a stiçâus. Lis lôr cjançons a contin moments di vite cuotidiane, il pierdisi dal se, l’acetâ la societât dulintor e ducj i compromès che le tegnin in pîts.

GUSHI E RAFFUNK feat Mirko Cisilino

La alchimie sonore di Gushi & Raffunk, la lôr ricercje eletroniche rafinade, fate di bas profonts, di motîfs ritmics ipnotics e di tramis ambientâls che a aurissin ae world music e ae improvisazion, e incrose la trombe di Mirko Cisilino e la sô sensibilitât jazz. Il live al devente un flus continuât, un rît contemporani di lûs e ombris li che eletroniche, improvisazion e sugjestion narative a crein atmosferis cinematografichis, a mieze strade tra la scolte profonde e il lassâsi lâ al ritmi.