“V iskanju izgubljenega jezika (Cirint la lenghe pierdude) e je une conte su la inafidabilitât de memorie. La memorie che nus bandone, la memorie che nus ingjane, la memorie che nus divît. Cheste e je une conte dal passât e dal vuê, dal passât che nol à mai rivât a jessi pardabon passât e dal presint, scjafoiât dal passât”
Goran Vojnović

La storie di doi fradis che di zovins a àn cjapadis stradis diferentis e cumò a son a stâ un di une bande e un di chê altre dal confin talian-sloven. Il prin al jere un fassist convint, il secont al jere un membri dal moviment partigjan che al veve une incarghe te aministrazion jugoslave. La storie e scomence cuant che il prin al à un ictus e al scomence a fevelâ te lenghe de sô infanzie, che il fi nol capìs, e la uniche persone che e pues judâlu e je la governante che e realize il so desideri di viodi il fradi. Par ducj i doi fradis e pe persone che ur je plui dongje di ducj, si trate di un confront comovent cul lôr passât e cun se stes. 

Seconde part de trilogjie Inabili alla morte/Nezmožni umreti

Spetacul par sloven cun soretitui par talian