A Malá Strana, tal secul diesim novesim, si leve indevant cun chê umile regolaritât asburgjiche che e faseve deventâ dutis lis robis compagnis e prevedibilis, come che a fossin stadis cussì di simpri e che lu saressin stadis in saecula saeculorum. Si cognossevin i siôrs e i lazarons, lis feminis severis e lis zovinis ribelis, e ognidun al recitave cun precision la sô part te comedie. Ancje i stramps a vevin un rûl, come il dotôr Vuastemistîrs: ma nol è che si clamàs propit cussì chest miedi laureât summa cum laude, fi, nevôt e pronevôt di miedis, che al veve molât stetoscopi e pazients, cjapât come che al jere dal so tasê straneôs e de sô biciclete insensade.
A Malá Strana, tal secul diesim novesim, lis robis a lavin indenant tant ordenadis e precisis che, ancje cuant che al murive cualchidun, soredut se si tratave di siôrs che si ju cognosseve virtuôs, la int di Praghe e jemplave il funerâl serene e apaiade: un al programave il corteu e lu vuidave, altris i lavin daûr là che si veve di lâ, cualchidun altri al vaìve pulît e za si preparave il ricuart de buine anime.
E jere lade cussì – al conte Jan Neruda – cuant che il destin al veve clamât il stimât conseîr Schepeler; la buinore dal funerâl, a vevin ducj une bocje di ridi braurose: i praticants aministratîfs che a puartavin la casse; il miedi che i jere stât dongje tes ultimis oris; il prin tra i erêts; il so “miôr amì”, popolâr e rispietât; e ancje la vedue (cun cualchi lagrime in plui par une partecipazion plui precise e ordenade).
A Malá Strana al jere vignût fûr un grant davoi cuant che, pe aspersion rituâl de Puarte di Újezd, la caroce dal muart e veve strabalçât sul teren iregolâr di pieris, e la casse e jere colade jù par tiere de bande strete: intun grant fracàs, jevantsi sù, no jerial saltât vie il tapon? In chel moment, par une di chês cumbinazions disordenadis che al à il mont, al capitave che al passàs pe Puarte il dotôr Vuastemistîrs, suturni come il so solit e in biciclete: al è stât cussì che chel malintopât si jere di bot cjatât devant il conseîr Schepeler, blanc, sbalçât un pôc fûr, cui zenoi pleâts e il braç di çampe a pendolon.
A Malá Strana e jere stade grande la conturbie tal viodi il dotôr Vuastemistîrs che al mateave cul puar conseîr: i vierzeve i voi, i sintive il pols, il pet. Tal corteu e jere vignude fûr dute une baraonde: i praticants a saltavin intor al miedi, l’erêt sielt al berlave bande il cîl, l’amì al coreve a clamâ lis vuardiis, e la vedue e colave in svaniment parsore de int che i zirave ator ator. Al jere stât in chel moment che il dotôr Vuastemistîrs – che par pôc lu sassinavin – cun sgrimie, dopo vê distirât il conseîr Schepeler e insistût sul pet e sul pols, al faseve notâ a dute chê babilonie che nol coventave vaî il muart: il cûr i bateve.
Di bocje in bocje, di pît in pît, pes stradis intorteadis di Malá Strana e coreve une peraule, che no si diseve a vôs alte, ma si le proferive cuntun sunsûr discret, che infin al sbrocave fûr intune sorprese disordenade, che nissun – gjavât il dotôr Vuastemistîrs – nol saveve ce che al provave: «al respire!». Il conseîr Schepeler al jere vîf.
A Malá Strana, tal secul diesim novesim, si jere po tornâts a lâ indevant cun chê umile regolaritât asburgjiche che e faseve deventâ dutis lis robis compagnis e prevedibilis, gjavade la matetât ustinade dal dotôr Vuastemistîrs: ducj lu cirivin, ducj lu riverivin, ma lui al continuave a preferî la biciclete ai pazients. Al sintive ator di se come une agjitazion: cuissà se e platave altris disordins miracolôs.

Alore, se e je vere che la aparence e imbroie, no lu fâs simpri cun tristerie – fûr che no sedi propit la intenzion dal bausâr. Se il mâr al è fer, al è ancje vêr che sot di chê pelicule grise blu si platin i moviments disordenâts dai abìs. Se il cîl al è net, e je ancje vere che di là dal turchin, tal scûr des galassiis, e je cualchi stele che e sclope o che e colasse, zontant altris turbins e gorcs intai disordins armonics che a durin di miliarts di agns. E disordins cosmics si presentavin devant dai voi inteligjents di cui che – un secul indaûr, tal mieç di une Europe fate a tocs de vuere grande – al intuive, e al cirive, dôs ideis portentosis e plenis di stimui, chês ideis che – al dîs Carlo Rovelli – «o crôt che la umanitât no vedi ancjemò digjerît»: la relativitât e la mecaniche cuantistiche. Al jere un trop di zovins, plens di brame, di slanç, di passions diferentis, e di asse un par chel altri: a disvelavin dôs visions che a savoltavin dut, sledrosant l’ordin che si cognosseve, e lis gnovis leçs di un univiers disordenât: al jere il vienês Pauli e il bavarês Heisenberg, che a lavin a scuele a Copenaghen sot di Niels Bohr, l’ongjarês e outsider János Neumann, che dopo si fasè clamâ “John von”, pari de informatiche dai nestris computer e dai algoritmis implacabii. Al jere chel altri di Viene, Schrödinger, cu la sô vite scjassose e plene, e soredut l’apolit Einstein, che cu la sô relativitât al veve viertis lis puartis a une nature che e leve daûr de “probabilitât” e che e mudave daûr di cui che le cjalave. In sumis, il cosmi cumò al pareve vuidât di un diu orent che al zuiave di tirâ i dadui: alore, no valie la pene di fâ come il dotôr Vuastemistîrs e cjapâ sù la biciclete?

E pûr, il disordin di chel univiers stramp, vignût fûr cent agns indaûr, al à dât il ritmi ae nestre ete fate di supertrens a alte velocitât, di robots cence anime, di tecnologjiis satelitârs, di risonancis magnetichis e di drons – che a puartedin regâi di Nadâl o bombis, chel no si sa.
E pûr, il disordin di chel univiers stramp, vignût fûr cent agns indaûr, si riflet tai sintiments de nestre ete; tal voli discocolât devant des lûs che a gjerometin di bessolis tal scûr; te gole infogade di cui che al vose a fuart il so malstâ pes novitâts continuis e pes imposizions; tal disorientament strac dai viazadôrs che no si fermin mai, libars o no; tal morbin di cui che al mude ogni truc intune pussibilitât gnove.
Ce si aial di fâ devant di dute cheste confusion? Si aial di provâ a tornâ a meti dut in rie, daûr des regulis fredis di une volte e dai algoritmis che a saran, o pûr si varessial di lassâsi lâ ae aventure, cu la bestialitât timide dal ses dai vincj agns, cjavalgjant ce che al ven, biel o brut che al sedi? Stâ a sotet tes nestris cjasis, cjalant intun schermi ce che al sucêt difûr, sperant che no nus tocji a nô, o pûr butâsi intal mieç de incuadradure tant che protagoniscj? O salacor, tant che un ecuilibrist sul fîl, provâ a traviersâ chest mont, clopant dilunc de nestre stradute fine, picjâts malsigûrs par aiar, parsore di un precipizi, bande la mete, tra barufis, ilusions, corsis, sperancis e altris disordins sontuôs?