La Associazion ricognossude Mittelfest e organize un festival multidissiplinâr (teatri, musiche e danze) e internazionâl, operant in dôs direzions: di une bande tant che vetrine di spetacul dal vîf in Italie; di chê altre, tant che istituzion culturâl inlidrisade tal teritori di Cividât, te regjon Friûl -Vignesie Julie. La Associazion e agjìs tant che puint tra la dimension nazionâl e chê mitteleuropeane.

Mittelfest al è nassût tal 1991, intun moment di incuintri rinovât tra Est e Ovest, intal ambit de “Pentagonâl”, che in chê volte e cjapave dentri i guviers di Italie, Austrie, Jugoslavie, Cecoslovachie e Ongjarie; tai agns dopo si è slargjade a 19 Nazions dal Centri e dal Est Europe dant vite ae Iniziative Centri Europeane (InCe – Cei).

La prime edizion dal festival e à viodût la ripartizion de direzion artistiche tra cinc diviersis personalitâts, di ancjetancj paîs: Giorgio Pressburger (Ongjarie/Italie), Tomás Ascher (Ongjarie), Jovan Ćirilov (Jugoslavie), Jiři Menzel(Cecoslovachie) e George Tabori (Austrie). Di trente agns, Mittelfest, cul so festival, al è lûc di incuintri tra lis diviersis lenghis e culturis de aree centri europeane e balcaniche.

Vuê, midiant dal teatri, de musiche e de danze, il Mittelfest al promôf il dialic tra 27 paîs europeans: Albanie, Austrie, Belgjiche, Bielorussie, Bosgne e Erzegovine, Bulgarie, Cravuazie, Estonie, Gjermanie, Grecie, Italie, Cossovo, Letonie, Lituanie, Macedonie dal Nord, Moldavie, Montenegro, Ongjarie, Paîs Bas, Polonie, Republiche Ceche, Romanie, Serbie, Slovachie, Slovenie, Svuizare, Ucraine.