Rivât ae seste edizion, Mittelyoung al è un festival a ducj i efiets, ricognossût a nivel internazionâl.
Mittelyoung si conferme la farie de gnove creativitât europeane: la seste edizion dal progjet di Mittelfest nassût tal 2021 par valorizâ e prudelâ il talent dai zovins, e segne un sucesson di domandis cun 238 propuestis di spetacui rivadis di 28 Paîs.
La call internazionâl e jere dedicade in mût esclusîf a artiscj e ensemble sot dai 30 agns che aromai a ricognossin in Mittelyoung, in sene dai 14 ai 17 di Mai a Cividât, une rampe di lanç par rivâ ai miôr palcs internazionâi.
Tra lis candidaturis rivadis, 110 a rivin dal forest e di cuasi ducj i Paîs ametûts ae selezion, ven a stâi: Albanie, Austrie, Belgjiche, Bosgne e Erzegovine, Bulgarie, Cravuazie, Estonie, Gjermanie, Grecie, Italie, Letonie, Paîs Bas, Polonie, Republiche Ceche, Romanie, Serbie, Slovachie, Slovenie, Svuizare, Ucraine e Ongjarie, cun cualchi sconfinament in nazions plui lontanis come Ingletiere, France e Spagne e fin in Iran, Israêl e Perù.
Gjermanie e Paîs Bas a son, come tai agns passâts, i Paîs cul numar plui alt di candidaturis, la prime cun 25 e i seconts cun 14, cuntune cressite straordenarie de Svuizare che e regjistre 11 domandis.
