Mittelfest 2024 | Disordini
Al via la open call per la quarta edizione di Mittelyoung

Novitâts te formazion dal cartelon e tes datis: in sene a Lui dal 2024 subit prin di Mittelfest

Doman, ai 14 di Dicembar, si vierç in maniere uficiâl la session di candidaturis internazionâl (open call) par partecipâ ae cuarte edizion di Mittelyoung, il progjet di Mittelfest dedicât ai artiscj mitteleuropeans che no àn inmò 30 agns e che a son clamâts a proponi spetacui di teatri, musiche, danze e circ dedicâts a Disordins, il teme che il diretôr artistic Giacomo Pedini al à sielzût pal 2024.

Come che al è stât fat fin de prime edizion, a saran i zovins a valutâ lis propuestis artistichis dai lôr coetanis: dutis lis candidaturis, di fat, a saran esaminadis di un grup di curatores, ancje lôr ducj sot dai 30 agns.

A son dôs lis novitâts de edizion 2024: e cambie la sudivision in categoriis dai nûf spetacui che a costituissin il cartelon di Mittelyoung, stant che doi a saran di teatri, doi di musiche, doi di danze, doi di circ e un a sielte libare dai curatores.

Come za anunziât, a cambiin ancje lis datis: Mittelyoung al larà in sene dai 16 ai 18 di Lui dal 2024, subit prin di Mittelfest, par no soreponisi cui progjets artistics di GO!2025.

“Mittelyoung al rive al cuart an tant che apontament aromai spietât, consolidât e organic di Mittelfest – al evidenzie Pedini – o sin braurôs di inmaneâ di gnûf la call internazionâl, une grande oportunitât pai artiscj zovins, e ancje di podê confermâ la rêt dai colaboradôrs regjonâi pe creazion dal grup dai curatores, che e viodarà l’ingrès dal teatri SNG Nova Gorica. Un fat che al conferme l’entusiasim di fâ part di chest grup di lavôr artistic, internazionâl e inovatîf.”

Tra i nûf spetacui di Mittelyoung, il stes grup di curatores al sielzarà ancje i trê titui vincidôrs, che a tornaran in sene a Mittelfest tra i 20 e i 22 di Lui: un mût in plui par valorizâ il lavôr dai artiscj zovins che a rivaran a Cividât.

“O crôt che lis personis che a àn mancul di 30 agns – al va indenant Pedini – a rapresentin i ponts di viste, lis vôs e lis prospetivis plui interessantis di scoltâ in relazion a chest secul. Il Nûfcent european – massime tal confin fra Est e Ovest – si jere sierât – ancje se cun fature – cun promessis di pâs e di une prosperitât che al pareve che a varessin vût di durâ par simpri. No je lade cussì: o sin daûr a traviersâ un moment une vore diferent, dulà che i ecuilibris e lis dinamichis si ribaltin su plui nivei, globâl, sì, ma ancje des comunitâts nazionâls e locâls. Cui mai podaraial contâ miôr di ducj dai ‘disordins’ di cheste epoche e salacor des lôr oportunitâts, se no chei che in chest timp a son nassûts e cressûts?”

Il bant Mittelyoung, che si lu pues scjamâ tal sît mittelfest.org, si siere ai 14 di Fevrâr e al è indreçât a artiscj di Albanie, Austrie, Belgjiche, Bielorussie, Bosgne e Erzegovine, Bulgarie, Cravuazie, Estonie, Gjermanie, Grecie, Italie, Cossovo, Letonie, Lituanie, Macedonie dal Nord, Moldavie, Montenegro, Paîs Bas, Polonie, Republiche Ceche, Romanie, Serbie, Slovachie, Slovenie, Svuizare, Ucraine, Ongjarie.

I progjets rivâts a vignaran esaminâts e valutâts, cul coordenament dal diretôr artistic, dal grup di curatores metût dongje in gracie de colaborazion di Associazion culturâl Arearea, Civiche Academie di Art Dramatiche Nico Pepe, Conservatori Statâl di Musiche Giuseppe Tartini di Triest, Conservatori Statâl di Musiche Jacopo Tomadini di Udin, Fondazion Luigi Bon, Universitât dai Studis di Triest, Universitât dal Friûl, e ancje Associazion culturâl Circo all’incirca, Associazion culturâl Quarantasettezeroquattro, Associazion di zovins Robida, Convit Nazionâl Paolo Diacono, Istitût Tecnic Arturo Malignani, Scuele di Danze Erica Bront, Teatri Club Udin – Pali Teatrâl dai Students. A fasaran part dal grup di curatores ancje personis selezionadis dal SNG Nova Gorica (Slovenie).

---

UFFICIO STAMPA MACROREGIONALE MITTELFEST

REPORTAGE – Tregi srl

Francesca Gatti +39 3479854644 | f.gatti@reportagepr.com

Giulia Daluiso +39 348 8547230 | ufficiostampa@reportagepr.com