MITTELFEST 2022: IMPREVISCJ dai 12 / 15 di Mai – ai 22 / 31 di Lui Cividât Direzion artistiche Giacomo Pedini

Mittelfest, ae sô xxxi edizion, si fâs dongje di chest timp sorprendent e al fronte cun doi festivai internazionâi il teme dai impreviscj

Mittelfest dai 22 ai 31 di lui: 28 progjets artistics che a rivin di 14 paîs, e tra chescj 20 primis assoludis o nazionâls e 10 produzions/coproduzions, metint adun lengaçs diviers e furnint ideis di riflession su la atualitât, la storie e la sience par orientâsi intun presint inspietât.

Mittelyoung dai 12 ai 15 di mai: une rassegne uniche in europe, che e met in sene, cun 9 spetacui selezionâts, la prose, la danze, la musiche e il circ de mitteleurope under 30, dant une poie concrete ai zovins.

Mittelfest al continue par dut l’an cun mittelland, un cartelon di ativitâts difondudis che al nas di colaborazions cun diviersis realtâts di un teritori di frontiere.

Al è un timp che nol finìs plui di savoltânus e di domandânus spazi pal inspietât chel che o passìn di plui di doi agns e che al à trasformât tant di ce che o clamavin “normalitât”. Ma dispès al è cussì che il futûr si fâs strade: cun events che a somein impreviscj e che invezit a jerin daûr a meti lidrîs di timp in nô e tra di nô.

Di chestis riflessions e nas la XXXI edizion di Mittelfest – festival multidissiplinâr di teatri, musiche e danze di riferiment pe aree Centrieuropeane e balcaniche cun sede a Cividât, che chest an al frontarà propit il teme IMPREVISCJ, tacant di une gnove imagjin dulà che si racuei, tant che intune graphic novel, la densitât dai events emerzûts e somerzûts che a determinin la sostance di une epoche.

La sielte dal teme e je di Giacomo Pedini, diretôr di Mittelfest pal trieni scomençât la edizion passade, che lu introdûs cussì: “I impreviscj a son il mont che al va indenant intant che o programìn cemût indreçâlu. A son la sdrume di events che a sucedin sot dai nestris voi, ma che a son lontans chel tant di scjampâ dal nestri cjamp visîf. I spetacui al Mittelfest a zirin ator dai impreviscj intes manieris plui diviersis, ancje parcè che, intun moment di tension fuarte bande Est, o metìn adun a Cividât lis sensibilitâts di tantis culturis, che il lôr incuintri za al gjenere alc che al sarà inedit. Mittelfest al è propit il festival dal spetacul mitteleuropean e pe Italie al è une ocasion preziose par cognossi une part impuartante e interessante dal nestri Continent, che masse dispès al è identificât dome cul so Ovest. L’Est e il Sudest european nus contin invezit une vore miôr lis particolaritâts de nestre epoche”. 

I doi festivai internazionâi a saran in sene dai 12 ai 15 di Mai, Mittelyoung, e dai 22 ai 31 di Lui, Mittelfest; invezit vie par dut l’an Mittelfest al va indevant cul non di Mittelland, cun events che a dan continuitât al festival e lu identifichin tant che puint tra colaborazions europeanis e realtâts dal teritori.

“Mittelfest al vûl jessi un progjet che si slargje di un teritori strategjic tant che chel dal Friûl – Vignesie Julie e a chel si grampe par imbastî colaborazions internazionâls e par jessi motôr culturâl pe Regjon, pe Italie e pe Mitteleurope, cul fin di intiessi relazions e di costruî puints intun moment storic dramatic tant che chel atuâl, plen di separazions. Chest inte convinzion che ae culture i tocji cumò plui di simpri di fâsi ambassadore di pâs”, al sclarìs il president dal Mittelfest Roberto Corciulo.

Mittelfest al aderìs ae European Festivals Association, Italiafestival, AGIS Nazionâl e al progjet GO!2025 Nova Gorica – Gurize, al colabore al Premio Rete Critica. Cun di plui al è realizât cul supuart internazionâl di Pro Helvetia Fondazion Svuizare pe culture, Forum Austriac di Culture a Milan, Kaunas – European Capital of Culture 2022, Onassis STEGI.

Il program

A son doi i spetacui che a traviersaran dute la manifestazion tant che un fîl de schene, metint in evidence il rapuart tra l’aspiet performatîf e chel digjitâl, Si trate di Déjà Walk dai AcquasumARTE (dai 22 ai 31 di Lui, prime assolude), une creazion site-specific che e consist intune cjaminade vie par percors de citât di Cividât, tornâts a interpretâ su la fonde di informazions furnidis di un tablet, di un pâr di scufis e des emozions individuâls. Il secont al è Death and Birth in my life di Mats Staub (dai 23 ai 31 di Lui), un spetacul instalazion che al met cubiis di spetatôrs devant di cubiis di naratôrs.

Si svicinin a chest ûs dal lengaç performatîf ancje trê spetacui inovatîfs di danze. Stand-alones dal grup austriac – la Austrie e sarà il Paîs ospit dal 2022, in graciis ancje dal supuart dal Forum Austriac di Culture a Milan – Liquid Loft (ai 23 e ai 24 di Lui, prime nazionâl), che al metarà in dialic assolos simultanis e moments corâi di danze cu lis oparis dal prin Nûfcent de “Galleria famiglia De Martiis”. Borderless body – first steps (ai 28 di Lui), di MN Dance Company, risultât di un laboratori che al fâs part dal percors viers GO!2025 Nova Gorica – Gurize. E infin One, One One di Ioannis Mandafounis (ai 25 di Lui, simpri intal focus svuizar).

Un altri filon tematic impuartant al è chel che al esplore sience, storie e atualitât, tacant cul spetacul che al à ispirât il teme di cheste edizion dal festival, La singolarità di Schwarzschild (ai 22 di Lui, prime assolude), metût in sene dal diretôr Giacomo Pedini di une conte dal libri dal autôr olandês cilen Benjamin Labatut Quando abbiamo smesso di capire il mondo dulà che si fevele de vite dal matematic e astrofisic todesc Karl Schwarzschild. 

Intal stes filon, il spetacul The Handke Project (Or, justice for Peter’s stupidities), scrit dal autôr cossovan Jeton Naziraj e diret di Blerta Neziraj, cun atôrs che a vegnin di Cossovo, Serbie, Bosgne e Erzegovine, Italie e Gjermanie e la coproduzion di Qendra Multimedia, Teatro della Pergola – Florence e Mittelfest (ai 23 di Lui, prime nazionâl), dulà che l’autôr, in chest moment particolâr de storie, cuntun conflit in pîts, si interoghe sul limit tra libertât di peraule e art. 

Une cjalade ae Storie viodude dal dì di vuê ancje par Il silenzio in cima al mondo (I voli taciturni di Dino Zoff), scrit di Giuseppe Manfridi e interpretât di Pamela Villoresi cu la musiche di Cristian Carrara (ai 24 di Lui, prime assolude), dulà che si torne a vivi la parabule dal grant portîr de nazionâl, che chest an al à finît otante agns. Il spetacul al è coprodot di Fondazione Pergolesi Spontini e Mittelfest.

Atuâl plui di simpri al è il conciert Simmetrie Oblique (Per Prokofiev) dulà che a saran insiemi sul palc la pianiste ucraine Natacha Kudritskaya e il violinist rus Aylen Pritchin (ai 31 di Lui, prime assolude), a mostrâ cemût che la art e sedi di là des vueris.

Al è clâr che Mittelfest 2022 al celebrarà il centenari de nassite di Pier Paolo Pasolini, metint in lûs in particolâr la sô produzion furlane e la grande rivoluzion che il poete di Cjasarse al à screât cu la viertidure aes lenghis minoritariis in leterature. Doi a saran i spetacui dedicâts a Pasolini cuntune gnove leture jazz: Pier Paolo Suite, che al met adun la musiche di Glauco Venier e la danze dai Arearea (ai 22 di Lui, prime assolude) e Rosada (ai 25 di Lui, prime assolude), titul che al ripuarte la peraule che e à vierzût a Pasolini la puarte de sô marilenghe. In sene dongje di Paolo Fresu, un dai plui impuartants protagoniscj de sene jazz contemporanie, la vôs di Elsa Martin. Il spetacul al è prodot dal Teatri Stabil Furlan, in colaborazion cun ARLeF – Agjenzie Regjonâl pe Lenghe Furlane, Argot Produzioni e Mittelfest.

In plui di chescj omaçs direts a Pasolini, chest an il furlan al devente plui di simpri protagonist dal festival intai spetacui Il silenzio in cima al mondo, che si à za fevelât, 

e Maçalizi (ai 29 e ai 30 di Lui, prime assolude), spetacul par furlan e talian voltât di Le Dieu du carnage de autore francese Yasmina Reza, diret di Fabrizio Arcuri e Rita Maffei e prodot di CSS Teatri stabil di inovazion F-VJ e Mittelfest, cun ARLeF – Agjenzie Regjonâl pe Lenghe Furlane.

In cheste suaze o cjatìn ancje il spetacul cun vôs e musiche Lasa pur dir / Pusti naj govorijo (ai 26 di Lui, prime assolude) un itinerari in musiche e di peraulis che al ricuarde i paisaçs, lis atmosferis e lis culturis di trê Paîs confinants, Italie, Slovenie e Austrie, e lis lôr carateristichis comunis, tacant dai mûts di dî.

Un dai protagoniscj di cheste edizion di Mittelfest al sarà il circ, la sô visionarietât e la esposizion dal cuarp tant che traduzion seniche dal imprevist. Chest filon dal program al è vierzût di un spetacul lituan che al inmaghe, Vizijos. Le visioni di Vytautas Mačernis (ai 22 e ai 23 di Lui, prime nazionâl) che il regjist Roberto Magro – furlan di origjin, internazionâl di vocazion – al dediche al poete lituan Mačernis e al compositôr Čiurlionis. 

Un altri grant protagonist al sarà il paiaç ucrain todesc Anatoli Akerman, za artist dal Cirque du Soleil e tra i protagoniscj di Dumbo di Tim Burton, che al sarà presint cun Kuku (ai 24 di Lui, prime nazionâl), spetacul emozionâl par grancj e fruts, cun doi paiaçs imprevedibii, cun mil abilitâts. Po dopo l’artist svuizar sfaçât Marc Oosterhoff, presint a Mittelfest 2022 cun doi spetacui che a son ancjemò part de colaborazion cun Pro Helvetia: Take care of yourself (ai 28 di Lui, prime nazionâl), Promises of uncertainty (ai 29 di Lui).

Il circ al devente ancje puarte di un festival par ducj, ancje pai plui piçui, cemût che al sucêt intal cabaret musicâl olandês Mr Moon – Moon cabaret di Eva Schumacher, cu la musiche dai Snowapple (ai 30 di Lui), un cabaret oniric di musiciscj, paiaçs, stelis dal spetacul e buratinârs in ordin sparniçât. A chest si met dongje Pizz’n’Zip, diret di Pietro Gaudioso (ai 31 di Lui), imbastît tant che un tipic conciert di cjamare, ma cuntun stîl lizêr, umoristic e ridicul.

Di chescj lûcs ancje il Progetto Tempesta (ai 24 di Lui) proponût dal Rossetti – Teatri Stabil dal Friûl-Vignesie Julie, cu la regjie di Antonio Panzuto, cui Piccoli di Podrecca, al segne la rinassite des marionetis preziosis di Podrecca intune leture inedite gnove de opare mestre di Shakespeare.

A completin il program propuestis musicâls nazionâls e internazionâls impuartantis, scomençant dal setôr de musiche classiche, tornade a pensâ cun sieltis imprevistis. Tant che il conciert tradizionâl de Orchestre dal F-VJ che si intitule Onde (sonore)  (ai 27 di Lui, prime assolude) e, cu la direzion dal Mestri austriac Michael Lessky e cul grant violinist Massimo Quarta, al traviersarà la culture musicâl tra Italie e Austrie.

Un grant protagonist, che al scomence chest an une lungje colaborazion cun Mittelfest, al sarà il pianist italosloven Alexander Gadjiev, che si esibirà intun conciert inedit par Mittelfest intitulât Sonate all’improvviso (ai 30 di Lui, prime assolude). Sorprendent in chest sens ancje il repertori di Impreviste eufonie (ai 27 di Lui, prime assolude), conciert proponût dal Conservatori Jacopo Tomadini di Udin, cu la direzion di Alfredo Barchi. Come ancje Apollon Socragète (lunis ai 25 di Lui, prime assolude), produzion italoserbe dal Conservatori G. Tartini” di Triest cu la Academie di Musiche di Novi Sad (Serbie) e il Conservatori Benedetto Marcello di Vignesie, che al met adun intal stes conciert il Socrate di Satie e l’Apollon Musagète di Stravinskij.

La musiche folk e devente protagoniste invezit cul grup slovac HRDZA che al propon Untamed/Il selvaggio (ai 28 di Lui), un conciert par vôs, ghitaris, flaut, violins, armoniche, batarie, bas e cul spetacul grêc Unspeakable Joys (ai 26 di Lui), cul cuartet di Harris Lambrakis, che al torne al Mittelfest cul so ney magjic.

A sierâ Mittelfest 2022 al sarà un vêr happening di musiche lizere cun La Rappresentante di Lista, tra i artiscj plui amâts de ultime edizion dal Festival di Sanremo: intune esibizion speciâl e sinfoniche dal so #mymammatour cu la Orchestra Arcangelo Corelli (ai 31 di Lui) in colaborazion cun Ravenna Festival.

MITTELYOUNG dai 12 ai 15 di Mai

Mitteyoung, il festival under 30 de Mitteleurope, al è stât une des novitâts plui grandis di Mittelfest 2021: ae sô seconde edizion al è deventât un apontament spietât e un unicum intal panorame european, par viodi une gjenerazion in sene, e tal stes timp par dâ un jutori produtîf concret ai zovins.

E di fat za al fâs aleancis impuartantis tant che chê cun Carinthischer Sommer Music Festival, e in particolâr cul progjet under 30: CS under 30, che di chest al sarà ospitât al Mittelfest un spetacul, sielzût de selezion ristrete; invezit a Villach in Avost al sarà ospitât un spetacul di musiche tra i 3 vincidôrs di Mittelyoung.

Par tornâ a passâ dutis lis tapis, ancje chest an la selezion dai spetacui in sene e nas di un bant pandût in ducj i Paîs de Mitteleurope, che al à vût rispueste in 148 propuestis, sometudis po dopo ae jurie di curatores under 30 componude di zovins che a vegnin di ents culturâi e di spetacul de aree furlane, dal stes Carintischer Sommer Music Festival, di SNG Nova Gorica, e in plui i vincidôrs de edizion passade.

6 a son i Paîs rapresentâts des oparis sielzudis (Italie, Paîs Bas, Austrie, Republiche Ceche, Lituanie, Gjermanie), cuasi dutis in prime assolude. I temis proponûts a son prin di dut chei dal ambient, de fluiditât dai gjenars, des lidrîs e dal futûr, e dal viaç che al sta tra chestis dôs polaritâts.  

Program:

Anteprime ai 11 di Mai, Udin, Glesie di Sant Francesc, Annelies, conciert di cjamare in prime nazionâl di James Whitbourn, ispirât ai Diaris di Anna Frank, cu la colaborazion tra Mittelfest, Fondazione Luigi Bon e Festival vicino/lontano.

Ai 12 di Mai a Cividât, conciert dal ensemble austriac Chez Fria intitulât Enimom Enis: un viaç musicâl imprevist dal baroc al funk e dal jazz ae eletroniche; il spetacul teatrâl talian Assenza sparsa di Pan Domu Teatro, di e cun Luca Oldani, za finalist al premi Patroni 2019 e vincidôr dal premi Intransito dal stes an.

Ai 13 di Mai a Cividât, spetacul di paiaçs talian G.A.S. de Compagnia del Buco, a rapresentâ la art dal circ. Spetacul teatrâl talian in prime assolude 17 selfie dalla fine del mondo di Riccardo Tabilio, risultât di un laboratori cui students dal Convit Nazionâl Paolo Diacono suntun progjet di Quarantasettezeroquattro, dentri dal program Realtâts Aumentadis de Regjon F-VJ.

Infin, spetacul interdissiplinâr in prime nazionâl dai Paîs Bas Percorrersi di Bibi Milanese, che al cumbine musiche, teatri e danze contemporanie.

Ai 14 di Mai spetacul di danze talian in prime assolude, Marea dal Trio Tsaba, za finalist di Strabismi Festival 2020, e part des residencis dal progjet Vettori di “La Contrada” di Triest e di “C.U.R.A., Centro Umbro Residenze Artistiche”, intal 2021. Po dopo al è un altri spetacul di danze, Nymphs di Niek Wagenaar, une prime assolude dai Paîs Bas. A sierâ la zornade une propueste in prime nazionâl de Republiche Ceche, Since my house burned down I now own a better view of the rising moon di Musasi Entertainment Company, ispirade aes contis popolârs gjaponesis.

Ai 15 di Mai Mittelfest si môf a Gurize, intal troi comun che al puartarà a GO! 2025 Nova Gorica – Gurize cuntun debut nazionâl de Lituanie che al messede danze, circ e musiche sot dal titul 107 ways to deal with pressure, di Kanta Company, e cun Vacation from love, une altre prime nazionâl de Gjermanie, par cure di Cuma Kollektiv, un conciert di teatri fisic.

Informazions: www.mittelfest.org

UFICI STAMPE MITTELFEST:

Nazionâl/ Internazionâl Giulia Calligaro giulia.calligaro4@gmail.com 0039.349.6095623

Macroregjonâl Francesca Gatti: f.gatti@reportagepr.com, 0039.347.9854644

Gjenerâl: ufficiostampa@mittelfest.org