L’INEVITABILE di Mittelfest 2023 al concuiste il public

Mittelfest 2023 al siere il sipari de edizion numar 32 che, ancje se il timp nol è simpri stât bon, e à viodût la partecipazion di un public numerôs e atent, che al à rispuindût in maniere pronte ae sfide al INEVITABILE.

Cun cheste sfide il palc di Mittelfest al à dât acet a plui di 30 progjets artistics. Di chescj, 14 a jerin primis assoludis o nazionâls e 7 produzions o coproduzions cun 250 artiscj, presints a Cividât, che a fasin part di 25 compagniis diviersis.

I spetacui di Inevitabile a àn regjistrât il 71% di ocupazion medie, percentuâl in linie cui risultâts dal 2022 ancje se il brut timp e lis previsions inciertis in cualchi ocasion a àn obleât a cambiâ il program e a fâ i spetacui intun lûc sierât. Al è di marcâ, dongje dal public storic dal festival, l’aument de fasse che e va dai 20 ai 35 agns.

Il sucès dai spetacui che a doprin un lengaç universâl, passant lis barieris linguistichis e di etât, come La Sarta, Drunken Master e Proper Mess + Pyrodise, al è stât grant.

I spetacui itinerants a àn fat vivi Cividât in maniere inedite e emozionante, cjapant dentri lis personis in dialics gnûfs e personâi cu la citât, cui lûcs, cun chel altri e cun se stes, in graciis de union tra teatri, musiche e tecnologjiis digjitâls.

Sodisfazion grande pal secont an di “Progetto Famiglia”, iniziative che e à puartât a teatri gjenitôrs e fruts par un presit speciâl e che e à viodût une cressite di presincis dal 15% a pet dal 2022.

Sodisfazion ancje pe tierce edizion di Mittelyoung: i nûf spetacui e i incuintris cui artiscj a àn regjistrât une afluence in linie cu la edizion passade, un sucès che si consolide e che si proiete su la cuarte edizion di Mittelyoung, za programade dai 16 ai 18 di Lui dal 2024 par no soreponisi cu la progjetualitât artistiche di GO!2025.

In Mai si invie il progjet speciâl comissionât de Regjon F-VJ, sostignût di e par GO!2025, prodot di Mittelfest cun SNG Nova Gorica, che al larà indevant pai prossims doi agns.

Ancje il progjet Mittelland al continue a cressi: la plateforme di esperiencis nassude par valorizâ la vocazion turistiche di Cividât, des Vas dal Nadison e de Tor e à viodût la organizazion di 30 events che a van indevant ancje tal mês di Avost e la colaborazion di 32 sogjets sul teritori.

Leam cul teritori al vûl dî ancje valorizazion des risorsis umanis: Mittelfest al à impegnât cirche 115 personis tra personâl organizatîf, tecnic, comunicazion, ufici stampe, personâl di sale e volontaris.

Lei dut il Comunicât Stampe CULÌ