Mittelounge al è l’apontament plui rilassât di Mittelfest: un spazi aperitîf che al met dongje musiche e convivialitât. Par cuatri seradis, di lunis ai 20 fin joibe ai 23 di Lui, des 19:15 fin che al va jù il soreli, doi grups musicâi par sere si esibissin par maraveâ il public intune atmosfere rilassade. I concierts a son ospitâts tal Ort des Ursulinis, un zardin tant biel che sugjestîf a doi pas dal Munistîr di Sante Marie di Val e dal Templut Langobart. Chest spazi vert, siôr di storie e di incjant, al è l’ambient ideâl par gjoldisi buine musiche e conversazions plasevulis tes seradis di Istât dal festival.
Program par cure di Alan Liberale, Simone Piva, Leo Virgili

Il Pont aperitîfs al è gjestît dal Bar da Giordano e Al Ponte – La botteguccia dei sapori

L’ingrès ai concierts al è libar
Il spazi al vierç aes 19.30 e al siere aes 21.15.

PainKillers

Une band alternative pop-punk che dal 2013 e scrîf la colone sonore de sô vite doprant la musiche tant che un vêr antidolorific. La lôr mission e je semplice: sunâ a fuart e contâ la lôr gjenerazion cun sinceritât, a traviers dal amôr, dal lancûr, de gjonde e dal caos. Il lôr ultin EP, Click, al segne l’inizi di un gnûf cjapitul. Dopo di vê esplorade la inciertece, cumò a cambiin pont di viste e a metin in prin plan la amicizie e i leams autentics. Suns gnûfs, ma cu la stesse voie di vivi ogni moment al massim e cence frens.

The NUV

Une band alternative rock caraterizade di un sun decîs e potent, nassude sul confin de Brianze tal 2003. Tal 2021 a incidin l’album che ju fâs svoltâ, Belgian Hop[e], che al segne pal tercet une fuarte evoluzion, sedi tal sun che te maturitât compositive, e a rinfuarcin il leam cu la sene europeane. Tal Avrîl dal 2026 a àn publicât Atomic, il prin singul dal lôr gnûf album, dulà che a àn colaborât cun I Dischi del Minollo (ITA), Waddafuzz Records (ITA), Araki Records (FRA) e cu la agjenzie Sorry Mom!