Mittelounge al è l’apontament plui rilassât di Mittelfest: un spazi aperitîf che al met dongje musiche e convivialitât. Par cuatri seradis, di lunis ai 20 fin joibe ai 23 di Lui, des 19:15 fin che al va jù il soreli, doi grups musicâi par sere si esibissin par maraveâ il public intune atmosfere rilassade. I concierts a son ospitâts tal Ort des Ursulinis, un zardin tant biel che sugjestîf a doi pas dal Munistîr di Sante Marie di Val e dal Templut Langobart. Chest spazi vert, siôr di storie e di incjant, al è l’ambient ideâl par gjoldisi buine musiche e conversazions plasevulis tes seradis di Istât dal festival.
Program par cure di Alan Liberale, Simone Piva, Leo Virgili

Il Pont aperitîfs al è gjestît dal Bar da Giordano e Al Ponte – La botteguccia dei sapori

L’ingrès ai concierts al è libar
Il spazi al vierç aes 19.30 e al siere aes 21.15.

Blue cash duo

Un viaç acustic tra country blues, rock’n’roll e folk, cuntun stîl diret e naratîf che al à lis lidrîs te tradizion americane. A Johnny Cash e ai grancj classics si zontin tocs origjinâi, metûts adun tant che piçulis contis: storiis di ogni dì, ironichis e cualchi volte disilududis, che a fevelin di amôr, di solitudin e di vite vere, mantignint simpri une vision clare e umane su la realtât. Un spetacul autentic, plen di energjie e comunicatîf, dulà che tradizion e scriture origjinâl si incrosin in mût spontani e personâl.

Cilio

Un spetacul live a alte energjie: funky, rap e pop si unissin intun cjantautorât fresc e inconfondibil. Figli di Provincia, il disc dal esordi dât fûr in Zenâr, al è la colone dal conciert. Un lavôr che si môf in ponte di pîts, fat di cjançons nassudis de urgjence di dî alc di autentic. Une musiche che e cjale al cjantautorât e al funky contemporani, cun incursions eletronichis e rangjaments essenziâi, intun flus dinamic che al cjape dentri cence fermâsi.