Il palc incredibil di Mittelfest in place dal Domo

Il prestigjôs palc a cîl viert di Mittelfest al torne in grant stîl, te sô edizion numar 33: un ambient pardabon incredibil par artiscj innomenâts.

Ai 19 di Lui si vierç il sipari cul tradizionâl conciert di scree che, adun cul conciert finâl, al insuaze a nivel musicâl il festival, une manifestazion che chest an, plui di simpri, e unìs cualitât e zûc.

Di fat, ai 19 di Lui o varìn l’Happy concert: in place dal Domo, adun cu la FVG Orchestra e cun Lucy Landymor aes percussions, a sunaran i doi di Igudesman & Joo, o sedi il violin di Aleksey Igudesman e il piano di Hyung-ki Joo. Nus proponaran un vêr miscliç musicâl che al va di Mozart ai Beatles, cui struments che a deventin simpri altri di ce che a varessin di sei. Il spetacul al è une coproduzion ARLeF – Agjenzie regjonâl pe lenghe furlane e Mittelfest 2024.

Invezit, a sierâ la edizion ai 28 di Lui, al sarà il conciert sinfonic Margherita Vicario – Gloria! de cjantautore, atore, autore di podcast e regjiste di cine Margherita Vicario, cuntune colaborazion che e va indenant za di agns cul Ravenna Festival: une opare musicâl che e cjape il titul dal so prin film che al à partecipât al ultin festival di Berlin, adun cu la Orchestra Corelli. Ancje in chest câs lis storiis di une cuotidianitât emozionante si compagnin ben cun elements musicâi ludics e di alt nivel.

Ai 21 di Lui, intune prime assolude, o varìn il tribût comovent al poete furlan Pierluigi Cappello, mancjât tal 2017, cul spetacul Le tue parole. Pierluigi, Scluse e il cîl, interpretât di Giuseppe Battiston, cu la musiche origjinâl di Piero Sidoti e la regjie di Paola Rota. La regjiste, adun cun  Battiston, è a curât ancje la dramaturgjie a partî dai materiâi origjinâi dal poete di Scluse, cjapant dentri lis sôs poesiis e lis prosis di “Questa libertà” (Rizzoli), alternant lis peraulis par talian e par furlan cu la musiche.

Ai 25 di Lui al torne a Mittelfest Moni Ovadia, pe prime volte dopo jessi stât diretôr dal festival dal 2003 al 2008: nus presente Senza Confini. Ebrei e zingari, une des sôs oparis plui impuartantis, ma cuntune musicalitât gnove, come che al è tal so stîl, par un recital fat di cjants, musichis, storiis rom, sintis, ebraichis che a rompin il scheme dal conformisim declarant che la libertât no si pues negoziâ.

Poetic e plen di ricuarts al è il spetacul Talk radio, par peraulis e musiche, in sene ai 22 di Lui, une prime assolude; ideât di Valter Sivilotti, suntun test di Angelo Floramo, al è interpretât di Alessio Boni; lis musichis a son di Glauco Venier, Mirko Cisilino e Alfonso Deidda. La ispirazion de storie e ven di chê stagjon strane di jazz che e je stade a Gurize tra il 1945 e il 1947, cuant che lis trupis americanis di liberazion a vevin viert une radio che e trasmeteve lis grandis oparis di Goodman, Duke Ellington e di Frank Sinatra, che al tacave in chê volte a fâsi notâ.

Voci vicine 2.0, ai 27 di Lui: lis peraulis di inchieste de gjornaliste Luciana Coluccello a saran compagnadis de musiche di Fabio Cifarello Ciardi cul Icarus Ensemble. Tantis vôs par denunziâ lis tragjediis de nestre ete, dal clime fin al lavôr e aes cuistions sociâls.

Pe world music, al torne a Mittelfest, ai 24 di Lui in place dal Domo, il grup Džambo Agušev Orchestra cun Brasses for masses: une baldorie di otons e di percussions che e ricuarde i bai sfrenâts dai matrimonis balcanics.

La danze e sarà presinte tal festival ancje cu la propueste italobelghe Fortuna, ai 26 di Lui: la ideazion, la regjie e la coreografie a son di Piergiorgio Milano;doi acrobats e balarins si movin suntune struture tant alte di fâ vignî l’inzirli, ricuardant lis cundizions pericolosis de navigazion cu la barcje a vele: un naufragji al contrari, li che i doi a vegnin fûr dai abìs.