mittelfest tabù

18-27 di lui 2025

Lis proibizions che a divegnin dal tabù no àn nissune justificazion; no si cognòs la lôr origjin; se par nô a son incomprensibilis, a son invezit naturâls par chei che ur son sometûts.

Sigmund Freud, Totem e tabù

«Rasponçule, dai, smole jù i cjavei: par vignî sù mi bastin chei».
Cun chestis peraulis – e conte la flabe – ogni dì la maghe e jentrave te tor dulà che e veve sierade dentri la dolce Rasponçule: a no ‘nd jerin altris ingrès, ni scjalis, ni puartis, dome une piçule barconete isolade tal bosc. La zovenute e viveve la sô vite alì: chel barcon al jere il confin di no passâ mai. E podeve jentrâ dome la maghe, e nuie altri plui. Fin che une dì nol passe par li dongje un zovin che al reste inmagât dal cjant di Rasponçule, alc che no si spietave. Viodût là che e jere la tor, dopo vê spiade la femine e imparade la litanie magjiche, cuntun truc al romp la improibizion di jentrâ: tignintsi pai luncs cjavei di aur de pueme, il zovenut al va sù pe torate, jentrant pal barcon. Tal viodilu, Rasponçule no sint ni pôre ni rabie, ma un sintiment gnûf che no cognosseve: il zovin al torne di scuindon ogni volte che al pues, simpri plui dispès, fin che la maghe no ju scuaie. Rasponçule e veve violât il striament de tor dal bosc: e ven esiliade tal desert, e al zovin i vegnin fluscâts i voi che a vevin contemplât l’amôr. Ma l’amôr al è potent, al rive a viodi passant cualsisei impediment, scrit o no: al è cussì che, dopo vê vagolât a dilunc, al puarte il zovin tal desert e i fâs cjatâ Rasponçule, e po dopo ancje la viste. Rot un incjantesim, a si ‘nd jere fat sù un altri.

I tabûs a son cidins: tant che Rasponçule te sô tor incjantade, a permetin di cjalâ il mont dentri de suaze di un barcon precîs. Cussì a dissegnin il confin invisibil tra i voi e ce che al incuiete, che al è proibît o pericolôs, e tal stes timp a confermin la sacralitât dai lûcs sigûrs dulà che si pues stâ cun serenitât.

E pûr i tabûs si movin, ancjemò une volte cidins: cussì, pe magjie di un incuintri o cence vê di dî altris peraulis, a cambiin il confin di ce che al à di restâ platât e di ce che al pues mostrâsi.  Duncje, te gjeografie e te storie, i tabûs a definissin lis leçs tasudis che la umanitât e cjape sù. E cuâi sono i tabûs che o sin daûr a vivi culì, tes nestris latitudins, e in cheste ete chi de lungje storie umane? Cuâi enigmis, dolôrs, fedeltâts, proibizions e desideris, limits, siums o pôris marcjino i nestris confins?

I tabûs e il lôr misteri, clâr o discognossût par cui che ju vîf, incomprensibii e evidents a cui che no ur è sometût, a son lis leçs no scritis che a sostegnin la magjie, atraente e spaventose, dal nestri mont svariât, plui ambigui che trasparent. Salacor, cence tabù no si à umanitât. A cui che al vûl, che al vedi il plasê di scuvierzilu.

Giacomo Pedini
Diretôr artistic di Mittelfest

Iscriviti ae nestre newsletter par jessi inzornât