Mittelfest_Facebook_cover_GIF.gif
 
 

La edizion 2018 di Mittelfest cul so teme, “I Millennials”, e prestarà la sene a cualchidun jenfri i plui brâfs zovins talents europeans, e ju metarà dongje di artiscj plui esperts e ecelents che a son ancje lôr “millennials” intes ideis e intal spirt.

Haris Pašović, diretôr artistic Mittelfest

 

Mittelfest 2018 si presente cuntune muse gnove: energjetic, zovin, origjinâl, e al torne ae vocazion internazionâl des origjins. Cussì al à volût il gnûf diretôr artistic Haris Pašović, regjist teatrâl di Sarajevo, pluripremiât, che al scree il so mandât trienâl cuntun program dedicât ai Millennials, i zovins dal gnûf mileni.

In sene a Cividât dai 5 ai 15 di Lui, Mittelfest 2018 al messede cun inteligjence stîi, gjenars, culture alte e popolâr, e si vierç a di un public diversificât e a prospetivis simpri plui atuâls, proponintsi tant che pont focâl artistic de Europe centrâl e dai Balcans.

 
 

“Creâ un teren comun pe identitât europeane. Viertidure mentâl, spirt internazionâl, rivalutazion des culturis locâls, valôrs europeans, rispiet dai dirits umans e de libertât di espression, dialic, serietât, maravee, gjonde, spirt di aventure, energjie creative: chescj a son i ponts fondamentâi di Mittelfest”, al sclarìs il Diretôr artistic.

 

Tornant al teme di cheste edizion, chê dai Millennials e je definide la gjenerazion nassude tra la fin dal secul XX e il principi dal secul XXI, cressude insiemi ae UE e che no à cognossût un mont prin de Europe, e che si môf disinvolte di là dai confins. Une gjenerazion tecnologjiche, dispès deludude de politiche. Daûr dai dâts, in Europe cheste gjenerazion e cjape dentri zovins che cualchi volte a son sfiduciâts e cualchi volte a son ribei; di imigrâts di seconde e di tierce gjenerazion ben integrâts o escludûts e pronts a scjaldâsi.

A son 'iperconetûts', a doprin instagram plui di facebook e, devant di un marcjât dal lavôr sierât, a san ancje rispuindi a cûr viert e puartâ une gnove urgjence e scletece inte espression artistiche.

Tai numars, Mittelfest chest an al varà 31 progjets artistics, 18 musicâi, 7 teatrâi, 3 di danze, 2 events e 1 progjet di danze par fruts: e tra chescj 4 primis mondiâls, 18 primis talianis, 30 primis regjonâls. A saran presints a Cividât centenârs di artiscj che a rivaran di plui di 20 Paîs.

 

31 progjets artistics

 52 Primis

 

Ma, ciert, Mittelfest al è ancje la sô tiere: une rêt di public, artiscj, ospits, citadins e une rêt di albiercs, ristorants e cafês, intune des tieris plui innomenadis di Italie pe storie e pai savôrs.

Cividât chest Istât al sarà duncje il lûc di no mancjâ pal spetacul dal vîf, ma ancje par fâ fieste, par condividi il futûr.

 

Il program al podarès vê cualchi variazion, indipendente de volontât dai organizadôrs.